ଷ୍ଟାଇପେଣ୍ଡ ପ୍ରଦାନ ଦାବିରେ ଛାତ୍ରଛାତ୍ରୀଙ୍କ ରାସ୍ତା ଅବରୋଧ

ଆଦିବାସୀ ଛାତ୍ରଛାତ୍ରୀମାନେ ଗତ ଶିକ୍ଷାବର୍ଷର ଷ୍ଟାଇପେଣ୍ଡ ଅର୍ଥ ବର୍ତମାନ ସୁଦ୍ଧା ପାଇ ପାରିନଥିବାରୁ ଏ ନେଇ ଆଜି ମୟୂରଭଞ୍ଜ ମୁକ୍ତି ମୋର୍ଚ୍ଚା ସଭାପତି ଧରମରାଜ ହାଁସଦାଙ୍କ ନେତୃତ୍ୱରେ ଛାତ୍ରଛାତ୍ରୀମାନେ ବାରିପଦାସ୍ଥିତ ୧୮ ନମ୍ବର ଜାତୀୟ ରାଜପଥ ଦାମଦରପୁର ଛକ ଠାରେ ରାସ୍ତା ଅବରୋଧ କରିବା ସହିତ ବିକ୍ଷୋଭ ପ୍ରଦର୍ଶନ କରିଛନ୍ତି।

ସମସ୍ୟାର ସମାଧାନ ନହେଲେ ଆହୁରି ଜୋରଦାର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି ଛାତ୍ରଛାତ୍ରୀ।

ଜଙ୍ଗଲରୁ ଛୁଆ ହାତୀର ମୃତଦେହ ଠାବ

ମୟୁରଭଞ୍ଜ ଜିଲ୍ଲା କପ୍ତିପଦା ରେଞ୍ଜ ନାଟୋ ଜଙ୍ଗଲରୁ ଛୁଆ ହାତୀର ମୃତଦେହ ଠାବ ହୋଇଛି।

ମୃତ ଛୁଆ ହାତୀର ଆନୁମାନିକ ବୟସ ୩ ମାସ ହେବ ବୋଲି ଅନୁମାନ କରାଯାଉଛି। ଛୁଆ ହାତୀଟି ୨ ଦନ୍ତାହାତୀ ଲଢେଇରେ ଚାପି ହୋଇ ପ୍ରାଣ ହରାଇଥିବା ସନ୍ଦେହ କରାଯାଉଛି।

ଦୁଇ ଭାଲୁ ଆକ୍ରମଣରେ ବୃଦ୍ଧ ଗୁରୁତର

ମୟୁରଭଞ୍ଜ ଜିଲ୍ଲା ଖୁଣ୍ଟା ବନବିଭାଗ ଅଧିନ ଗୋଠପୁରା ଗ୍ରାମର ବାଲାଏ ହାଁସଦା ଆଜି ସକାଳ ସମୟରେ ନିକଟସ୍ଥ ଜଙ୍ଗଲରେ ଛତୁ ସଂଗ୍ରହ ପାଇଁ ଯାଇଥିବା ବେଳେ ଦୁଇଟି ଭାଲୁ ତାଙ୍କୁ ଆକ୍ରମଣ କରିଥିଲେ ।

ଆକ୍ରମଣରେ ପେଟର ଅନ୍ତବୁଜଳି ବାହାରି ପଡ଼ିଥିବା ବେଳେ ତାଙ୍କୁ ସଙ୍କଟାପନ୍ନ ଅବସ୍ଥାରେ ଉଦ୍ଧାର କରାଯାଇ ଉଦଳା ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଥିବା ଜଣାଯାଇଛି ।

ଅଲ ଓଡ଼ିଶା ଓକିଲ ସଂଘର କାର୍ଯ୍ୟକାରୀଣି ବୈଠକ ଅନୁଷ୍ଠିତ

ଅଲ ଓଡ଼ିଶା ଓକିଲ ସଂଘର କାର୍ଯ୍ୟକାରୀଣି ବୈଠକ ବାରିପଦା ସ୍ଥିତ ହୋଟେଲ ସ୍ୱସ୍ତିକ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଛି। ମୟୁରଭଞ୍ଜ ଜିଲ୍ଲା ଓକିଲ ସଂଘର ସହଯୋଗରେ ଅନୁଷ୍ଠିତ ଉକ୍ତ ବୈଠକରେ ରାଜ୍ୟ ସମେତ ଜିଲ୍ଲାର ଓକିଲ ମାନେ ଯୋଗ ଦେଇ ଆଗାମୀ ରାଜ୍ୟସ୍ତରୀୟ ସମ୍ମିଳନୀ ନେଇ ପ୍ରସ୍ତୁତି ବୈଠକ ସହ ଆଲୋଚନା କରିଥିଲେ।

ଜିଲ୍ଲା ଓକିଲ ସଂଘର ସଭାପତି ପ୍ରଦୀପ କୁମାର ରଥଙ୍କ ପୌରହିତରେ ଅନୁଷ୍ଠିତ ଉକ୍ତ ବୈଠକରେ ରାଜ୍ୟ ସଭାପତି ଗୋପାଳକୃଷ୍ଣ ମହାନ୍ତି ଯୋଗ ଦେଇଥିଲେ।ରାଜ୍ୟସ୍ତରୀୟ କର୍ମକର୍ତ୍ତା ସମ୍ମିଳନୀ ଚଳିତ ବର୍ଷ ବାରିପଦାରେ ଅନୁଷ୍ଠିତ କରିବା ନେଇ ପ୍ରସ୍ତାବ ଆଗତ କରଯାଇଛି।

ନୂତନ ଏସଡିପିଓଙ୍କ ଯୋଗଦାନ

ବାରିପଦା ସଦର ନୂତନ ଏସଡିପିଓ ପ୍ରକାଶ ଜେମ୍ସ ଟପ୍ପୋ କାର୍ଯ୍ୟରେ ଯୋଗଦାନ କରିଛନ୍ତି। ପୂର୍ବରୁ କେନ୍ଦୁଝର ସଦର ଏସଡିପିଓ ଭାବେ କାର୍ଯ୍ୟ କରୁଥିବା ବେଳେ ନୂତନ ଭାବେ ବଦଳି ପରେ ଆଜି କାର୍ଯ୍ୟରେ ଯୋଗଦାନ କରିଛନ୍ତି।

ବାରିପଦା ସ୍ଥିତ ଉପଖଣ୍ଡ ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ଠାରେ ଥାନା ଅଧିକାରୀ ଓ ପୋଲିସ କର୍ମଚାରୀ ମାନେ ପୁଷ୍ପ ଗୁଚ୍ଛ ଦେଇ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରିଥିଲେ।ପୂର୍ବତନ ଏସଡିପିଓ କେକେ ହରିପ୍ରସାଦଙ୍କ ପୁରୀ ସଦରକୁ ବଦଳି ହୋଇଥିବା ବେଳେ ତାଙ୍କ ଠାରୁ କାର୍ଯ୍ୟ ଭାର ଗ୍ରହଣ କରିଛନ୍ତି।

ବାରିପଦାରେ ହେବ ରାଜ୍ୟର ଦ୍ୱିତୀୟ ଫାୟାର ପାର୍କ

ବାରିପଦାରେ ହେବାକୁ ଯାଉଛି ଫାୟାର ପାର୍କ ତଥା ଅଗ୍ନିଶମ ଓ ବିପର୍ଯ୍ୟୟ ପରିଚାଳନା ଉଦ୍ୟାନ। ପ୍ରଥମ କରି ଓଡ଼ିଶାର ଭୁବନେଶ୍ୱର ଠାରେ ଫାୟାର୍ ପାର୍କ ସ୍ଥାପନ ହୋଇଥିବା ବେଳେ ଦ୍ୱିତୀୟ ପାର୍କ ହେବ ବାରିପଦାରେ।

ବାରିପଦା ସ୍ଥିତ ଅଗ୍ନିଶମ କେନ୍ଦ୍ର ଠାରେ ଉକ୍ତ ଫାୟାର ପାର୍କ ହେବା ସହ ଅଗ୍ନି ନିର୍ବାପକ ଯନ୍ତ୍ର ସହ ବିପର୍ଯ୍ୟୟ ପରିଚାଳନା ଜନସାଧାରଣ ସମେତ ଶିକ୍ଷାନୁଷ୍ଠାନ ଗୁଡ଼ିକର ଛାତ୍ରଛାତ୍ରୀଙ୍କୁ ସଚେତନତାର ବାର୍ତ୍ତା ବାଣ୍ଟିବା ପାଇଁ ମହତ୍ୱପୂର୍ଣ୍ଣ ଭୂମିକା ତୁଲାଇବ ବୋଲି ଅଗ୍ନିଶମ ଅଧିକାରୀ ଭବେନ୍ଦ୍ର ନାଥ ଦେ ସୂଚନା ଦେଇଛନ୍ତି। ଏନେଇ ରାଜ୍ୟ ମହାନିର୍ଦ୍ଦେଶକ ଅଗ୍ନିଶମ ବାହିନୀ ପତ୍ର ସଂଖ୍ୟା ୪୨୦୭/୨୨ରେ ସୂଚନା ଦେଇଛନ୍ତି।

ଫୁଟବଲ ଏକାଡେମୀ ପ୍ରତିଷ୍ଠା ପାଇଁ ଆନ୍ଦୋଳନ କରିବ ଭଞ୍ଜସେନା

ଆଦିବାସୀ ବହୁଳ ମୟୁରଭଞ୍ଜ ଜିଲ୍ଲା ହେଉଛି ଫୁଟବଲର ଏନ୍ତୁଡ଼ିଶାଳ। ତେବେ ଜିଲ୍ଲାରେ ଫୁଟବଲ ଏକାଡେମୀ ପ୍ରତିଷ୍ଠା ପାଇଁ ଅଭିନବ ଭାବେ ଆନ୍ଦୋଳନ କରିବା ନେଇ ଭଞ୍ଜସେନା ପକ୍ଷରୁ ପ୍ରେସ ବିବୃତ୍ତିରେ ଆଦିବାସୀ ଶାଖା ସଭାପତି ବାଜୁନ ହାଂସଦା କହିଛନ୍ତି।

ଦାବି ଉପସ୍ଥାପନ ପାଇଁ ଅକ୍ଟୋବର ମାସ ୭ ତାରିଖ ବାରିପଦା ସ୍ଥିତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଫୁଟବଲ ଖେଳାଳୀ ମାନେ ଖେଳ ପୋଷାକ ସହ ଫୁଟବଲ ମ୍ୟାଚ ଖେଳି ଅଭିନବ ପ୍ରତିବାଦ କରିବେ ବୋଲି କହିଛନ୍ତି।

ବିଶ୍ଵବିଦ୍ୟାଳୟର ୨୬ ଜଣିଆ ବିସିଜେଡି କ୍ୟାମ୍ପସ୍ କମିଟି ଗଠିତ

ସ୍ଥାନୀୟ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର କ୍ୟାମ୍ପସ୍ କମିଟି ଗଠନ କରିଥିବା ନେଇ ସୂଚନା ଦେଇଛନ୍ତି ବିସିଜେଡି ରାଜ୍ୟ ସଭାପତି ଦେବୀ ରଞ୍ଜନ ତ୍ରିପାଠୀ। ଉକ୍ତ କମିଟିରେ ଅଭିଷେକ ପଣ୍ଡାଙ୍କୁ ଆବାହକ, ଜ୍ୟୋତିପ୍ରଜ୍ଞା ଓ ପୃଥ୍ୱୀରାଜଙ୍କୁ ସହ ଆବାହକ ସମେତ ସମୁଦାୟ ୨୬ଜଣ କମିଟିରେ ରହିଛନ୍ତି।

ଛାତ୍ରଛାତ୍ରୀ ମାନଙ୍କ ମୌଳିକ ସମସ୍ୟାର ସମାଧାନ ଏବଂ ସେମାନଙ୍କ ମଧ୍ୟରେ ନେତୃତ୍ୱ ନେବାର କଳାକୁ ବିକଶିତ କରିବା ପାଇଁ ରାଜ୍ୟରେ ପ୍ରଥମ ଥର ପାଇଁ ଏଭଳି ଅଭିନବ ପ୍ରୟାସ କରିଥିବା ବିସିଜେଡି ପକ୍ଷରୁ କୁହାଯାଇଛି।

ଏମ୍.ପି.ସି କଲେଜରେ ରକ୍ତ ଦାନ ଶିବିର ୧୩୫ ୟୁନିଟ ସଂଗ୍ରହ

ମହାରାଜା ପୂର୍ଣ୍ଣଚନ୍ଦ୍ର ସ୍ଵୟଂଶାସିତ ମହାବିଦ୍ୟାଳୟରେ ଜାତୀୟ ସେବା ସଂସ୍ଥା ଦ୍ୱାରା ଏକ ମେଗା ରକ୍ତଦାନ ଶିବିର ଅନୁଷ୍ଠିତ ହୋଇଥିଲା। ଜାତୀୟ ସେବା ଯୋଜନା ପକ୍ଷରୁ ଆୟୋଜିତ ଶିବିରରେ କଲେଜର ଅଧ୍ୟାପକ, ଛାତ୍ରଛାତ୍ରୀଙ୍କ ସହିତ ୧୩୫ଜଣ ସ୍ବେଚ୍ଛାକୃତ ରକ୍ତଦାନ କରିଛନ୍ତି।

ସମସ୍ତ ରକ୍ତଦାତାଙ୍କୁ ଆଶୁ ସେବା ପ୍ରଦାନ ସାଙ୍ଗକୁ ସାର୍ଟିପିକେଟ ଏବଂ ଆଇକାର୍ଡ ପ୍ରଦାନ କରାଯାଇଛି। ରକ୍ତଦାନ ଶିବିରର ପରିଚାଳନାରେ ମହାବିଦ୍ୟାଳୟର ଜାତୀୟ ସେବା ଯୋଜନାର ସ୍ବେଚ୍ଛାସେବୀ ସହଯୋଗ କରିଥିଲେ।

ନାବାଳିକା ଦୁଷ୍କର୍ମ ମାମଲାରେ ଅଭିଯୁକ୍ତକୁ ୧୦ ବର୍ଷର କାରାଦଣ୍ଡାଦେଶ

ମୟୁରଭଞ୍ଜ ଅତିରିକ୍ତ ଜିଲ୍ଲା ଓ ଦୌରା ଜର୍ଜ ତଥା ସ୍ୱତନ୍ତ୍ର ଫାଷ୍ଟ ଟ୍ରାକ କୋର୍ଟର ବିଚାରପତି ଦୁର୍ଗାଚରଣ ମିଶ୍ର ଶୁକ୍ରବାର ଜୈନିକା ନାବାଳିକା ଦୁଷ୍କର୍ମ ମାମଲାର ବିଚାର କରି ଅଭିଯୁକ୍ତ କନ୍ଦା ହେମ୍ବ୍ରମ ଓରଫ ଲକ୍ଷ୍ମଣ ମାଝିକୁ ୧୦ବର୍ଷ ସଶ୍ରମ କାରାଦଣ୍ଡ ଦଣ୍ଡିତ କରିଛନ୍ତି।

ଏଥି ସହିତ ୩୦ହଜାର ଟଙ୍କାର ଜରିମାନା ଓ ଅନାଦେୟ ଅଧିକ ୨ବର୍ଷର କାରାଦଣ୍ଡ ଭୋଗିବାକୁ ରାୟରେ ଦର୍ଶାଇଛନ୍ତି। ଅଭିଯୁକ୍ତ ପିଡିତାଙ୍କୁ ଏକୁଟିଆ ପାଇ ପାଖ ଜଙ୍ଗଲରେ ଦୁଷ୍କର୍ମ କରିଥିଲା।

Nuakhai wishes